Profesorët dhe mjekët i bashkohen protestës së studentëve kundër Vuçiqit

Edhe profesorët dhe hulumtuesit e Universitetit të Novi Sadit kanë organizuar sot një marsh në mbështetje të studentëve që po protestojnë tash e disa javë kundër qeverisjes së presidentit të Serbisë, Aleksandar Vuçiq.

Të gjithë janë mbledhur në orën 11:30 para ndërtesës së Akademisë së Arteve, nga ku kanë ecur deri në kampus, shkruan danas.rs.

Në sheshin para Fakultetit të Mjekësisë, nga ora 10:45, janë mbledhur punonjës të shëndetësisë, mjekë, stomatologë, farmacistë, teknikë mjekësorë, fizioterapistë dhe të tjerë dhe janë nisur në marsh proteste drejt Akademisë, të cilëve u janë bashkuar edhe profesorët për të shkuar deri tek kampusi.

Pas 15 minutash heshtje, e cila filloi në nderim të 15 viktimave të shembjes së strehës së jashtme prej betoni në Stacionin e Trenit në Novi Sad, kolona u nis drejt kampusit.

Kujtojmë se studentët nuk janë të kënaqur me qeverisjen e Vuçiqit dhe po kërkojnë ndryshime radikale në fusha të jetës.

Ndryshe, studentët po kërkojnë edhe drejtësi për 15 viktimat e Novi Sadit.

https://x.com/Radio021/status/1880557921710617055?ref_src=twsrc%5Etfw%7Ctwcamp%5Etweetembed%7Ctwterm%5E1880557921710617055%7Ctwgr%5E09802499fdb8b6a923c55bfcd86dce7f2cea4746%7Ctwcon%5Es1_&ref_url=https%3A%2F%2Ftelegrafi.com%2Fprofesoret-dhe-mjeket-bashkohen-protestes-se-studenteve-kunder-vuciqit%2F