Kosovë: IKSHPK-ja bën thirrje për vaksinim, thotë se gripi sezonal e ka kaluar pragun epidemik

@pixabay

Instituti Kombëtar i Shëndetësisë Publike të Kosovës të enjten ka thënë se gripi sezonal e ka kaluar pragun epidemik.

Përmes një njoftimi në rrjetin social “Facebook”, IKSHPK-ja ka bërë thirrje për vaksinim teksa ky konstatim ka ardhur pasi është rritur numri i qytetarëve që kërkojnë ndihmë në institucionet shëndetësore.

“Instituti Kombëtar i Shëndetësisë Publike të Kosovës (IKSHPK) u bën thirrje qytetarëve që të vaksinohen kundër Gripit sezonal, ndërkohë që javën e fundit, sipas numrit të rasteve të raportuara, intensiteti i gripit është në aktivitetin e lartë të qarkullimit duke e kaluar pragun epidemik. Kjo rritje rezulton me rritje të fluksit të qytetarëve që kërkojnë ndihmë mjekësore në institucionet shëndetësore”, thuhet në njoftim, transmeton Albinfo.ch.

Tutje, bëhet e ditur se gripi sezonal është sëmundje akute infektive, e cila te një numër i konsideruar i rasteve shkakton komplikime serioze shëndetësore, “veçanërisht te fëmijët, të moshuarit dhe personat me sëmundje kronike, ndërsa vaksinimi  është mënyra më e mirë për të parandaluar gripin dhe reduktuar rrezikut”.

IKSHPK-ja ka bërë thirrje te të gjithë qytetarët të vaksinohen si masë parandaluese.

“…me theks të veçantë grupeve me prioritet si: punëtorët shëndetësorë; gratë shtatzëna; personat me sëmundje kronike dhe me imunitet të komprometuar; personat mbi 65 vjeç; dhe fëmijët e moshës nga 6 muaj deri në 5 vjeç me indikacione shëndetësore”, thuhet në njoftim.

Sipas IKSHPK-së, Ministria e Shëndetësisë ka siguruar për këtë sezon 85 mijë doza të vaksinës, dhe qytetarët mund të vaksiohen në secilën komunë, në qendrën më të afërt të mjekësisë familjare.