Ndërpritet seanca në Gjykatën Speciale në Hagë për shkak të problemeve shëndetësore të Hashim Thaçit

Keystone (AP Photo/Jerry Lampen via AP Photo, Pool)

Ish-presidenti i Kosovës, Hashim Thaçi, i cili po gjykohet në Dhomat e Specializuara të Kosovës në Gjykatën Speciale, nuk ka mundur të jetë i pranishëm në seancën e së martës për shkak të problemeve shëndetësore, përcjell albinfo.ch. 

Avokati i tij, Luka Misetiq, ka deklaruar se është njoftuar nga sekretari se klienti i tij nuk është mirë me shëndet.

“Sekretarja më njoftoi se klienti nuk ndihej mirë dhe nuk mund të merrte pjesë në seancën e sotme. Nuk jam konsultuar fare me klientin lidhur me këtë. Mendova se ishte zgjidhur prej jush”, tha Misetiq.

Edhe gjyqtari Charles Smith ka thënë se i vetmi komunikim që kanë pasur ka qenë lidhur me gjendjen shëndetësore.

“I vetmi komunikim ishte se nuk ka qenë mirë me shëndet dhe duhej të fliste me një mjek”, tha Smith.

Seanca e së martës po vazhdon, pasi avokati njoftoi se Thaçi ka dhënë leje për të vijuar.

“Më thanë se Thaçi dhe mjeku kanë nënshkruar dokumentin për ta vazhduar gjykimin”, njoftoi Misetiq.

Aktualisht, seanca në Speciale po mbahet me dyer të mbyllura.

Thaçi, Veseli, Krasniqi dhe Selimi ndodhen në paraburgim prej vitit 2020.

Ata akuzohen nga Zyra e Prokurorit të Specializuar (ZPS) për vrasje, torturë e trajtim mizor në periudhën mes viteve 1998–1999.

Në procesin gjyqësor që ka nisur më 3 prill 2023, ish-drejtuesit e UÇK-së janë deklaruar të pafajshëm për të gjitha pikat e aktakuzës.