Kosovë: Vendoset të rinumërohen 1631 fletëvotime

Foto: albinfo

Paneli Zgjedhor për Ankesa dhe Parashtresa në Kosovë ka pranuar ankesën e Lëvizjes Vetëvendosje për hapjen e të gjitha kutive të votimit për fletëvotimet e dërguara nga votuesit jashtë Kosovës në kutitë postare të Komisionit Qendror të Zgjedhjeve, për zgjedhjet e mbajtura më 9 shkurt.

Sipas PZAP-së, me këtë vendim është udhëzuar KQZ-ja, respektivisht Qendra e Numërimit dhe Rezultateve, që të bëjë hapjen e 177 kutive të votimit, me 1,631 fletëvotime të pavlefshme, të dërguara nga votuesit jashtë Kosovës në kutitë postare të KQZ-së. Të njëjtat fletëvotime do të rivlerësohen, numërohen dhe përfshihen në rezultatet përfundimtare.

PZAP po ashtu ka hedhur poshtë dy ankesa të Lëvizjes Vetëvendosje lidhur me parregullsitë gjatë numërimit të votave me postë, duke i konsideruar të pasafatshme. /KSP