Specialja ia pamundëson Thaçit pjesëmarrjen në ceremoninë e varrimit të babait të tij 

Gjykata Speciale e Kosovës me seli në Hagë raportohet se nuk i ka dhënë leje ish-presidentit Hashim Thaçi që të marrë pjesë në ceremoninë e varrimit të babait.

Lajmin e kanë bërë të ditur Organizata e Veteranëve të Luftës së Ushtrisë Çlirimtare të Kosovës.

Përmes një reagimi publik, ata u shprehën të indinjuar me këtë vendim.

“Ky vendim nuk është vetëm një shkelje flagrante e të drejtave themelore të njeriut, por edhe një akt që bie ndesh me vlerat universale të humanizmit dhe drejtësisë. Të ndalosh një bir që t’i japë nderimin e fundit babait të tij është një akt i dhimbshëm që cenon dinjitetin dhe ndjenjat më të thella njerëzore”, thuhet në reagim, transmeton albinfo.ch.

Tutje, Organizata e Veteranëve të Luftës së UÇK-së e konsideron këtë veprim si një akt të qëllimshëm dhe dashakeq të Gjykatës Speciale, e cila, sipas tyre, synon të poshtërojë dhe të degradojë jo vetëm Hashim Thaçin dhe familjen e tij, por të gjithë ish-luftëtarët dhe vlerat për të cilat ata luftuan, në shenjë hakmarrjeje për mungesën e provave për inkriminimin dhe dënimin e drejtuesve të UÇK-së.

“I bëjmë thirrje institucioneve ndërkombëtare, organizatave të të drejtave të njeriut, institucioneve dhe faktorit politik të Kosovës dhe Shqipërisë që të reagojnë fuqishëm ndaj kësaj shkeljeje të të drejtave themelore dhe të marrin masa që raste të tilla të mos përsëriten, sepse të drejtat themelore nuk duhet të jenë objekt i abuzimit apo i hakmarrjeve. Organizata e Veteranëve të Luftës së Ushtrisë Çlirimtare të Kosovës nuk do ta tolerojë heshtjen e institucioneve të Republikës së Kosovës ndaj shkeljeve, abuzimeve dhe trajtimit përçmues që po iu bëhet bashkëluftëtarëve tanë nga Gjykata Speciale në Hagë!”, përfundon reagimi.