Ish-ministri britanik për njohjen e Kosovës nga Kenia: Vendim i mençur, sundimi serb nuk do të kthehet më

Ish-ministri i Britanisë së Madhe për Evropën, Denis MacShane, e ka vlerësuar si vendim të mençur njohjen e pavarësisë së Kosovës nga Kenia.

Sipas tij, ky hap është në përputhje me qëndrimet e demokracive kryesore botërore.

Përmes një postimi në rrjetin social “Twitter”, ai ka reaguar ndaj kritikave të presidentit serb, Aleksandar Vuçiq, duke e quajtur atë një “kukull të Putinit” dhe duke theksuar se sundimi serb mbi Kosovën nuk do të kthehet më, transmeton albinfo.ch.

“Një lëvizje e mençur nga presidenti kenian, William Ruto, për të njohur Kosovën, në linjë me të gjitha ekonomitë kryesore demokratike. Kukulla e Putinit, lideri serb Vuçiq, bërtet, por Kenia, si Kosova, e di çfarë do të thotë të jesh një koloni. Sundimi serb mbi Kosovën nuk do të kthehet më”, ka shkruar ai.

Ndryshe, MacShane ishte një nga mbështetësit e pavarësisë së Kosovës që nga fillimi, duke kritikuar vazhdimisht politikën e Serbisë ndaj Kosovës dhe ndikimin e Rusisë në rajon. Ai kishte theksuar se pavarësia e Kosovës është e pakthyeshme dhe se njohja nga shtete të tjera tregon se komuniteti ndërkombëtar po e konsolidon këtë realitet.