Zvicër: Kantoni Zug ul tarifat për marrjen e patentë shoferit

Qeveria kantonale e Zugut ka vendosur të ulë tarifat për një sërë shërbimesh të Zyrës së Trafikut Rrugor, në përputhje me një kërkesë të parashtruar nga grupi parlamentar i SVP-së në dhjetor 2021. Drejtoria e Sigurisë njoftoi të mërkurën se kjo masë synon të lehtësojë barrën financiare mbi qytetarët dhe ekonominë lokale, shkruan Blick, transmeton albinfo.ch.

Ulja do të prekë tarifat për marrjen e patentës së shoferit, dokumentet e regjistrimit të automjeteve, inspektimet teknike dhe lejet e veçanta. Megjithatë, nuk do të ketë ndryshime për tarifën e paracaktuar dhe gjobat, pasi autoritetet theksojnë se nuk duan të shpërblejnë sjelljen e paligjshme.

Sipas qeverisë, tarifat janë krahasuar me ato të kantoneve të tjera në Zvicrën Qendrore, si dhe me Aargau-n dhe Cyrihun, me synimin që të jenë “të balancuara dhe tërheqëse”, transmeton albinfo.ch.