Zvicra mbyll ambasadën në Iran, ambasadorja largohet nga territori

Përballë përshkallëzimit të operacioneve ushtarake dhe situatës gjithnjë e më të paqëndrueshme në Iran, Zvicra ka mbyllur përkohësisht ambasadën e saj në Teheran. Lajmin e konfirmoi Ministri i Jashtëm zviceran, Ignazio Cassis, duke njoftuar se ambasadorja Nadine Olivieri Lozano është larguar gjatë natës së të enjtes drejt të premtes, së bashku me pjesën e mbetur të stafit diplomatic, transmeton albinfo.ch.

“FDFA ka vendosur të mbyllë përkohësisht ambasadën e saj në Teheran. Stafi i huaj është larguar nga territori iranian dhe është i sigurt”, thuhet në një deklaratë të Ministrisë së Jashtme zvicerane. Evakuimi është realizuar me rrugë tokësore dhe diplomatë zviceranë kanë mbërritur në Azerbajxhan të premten në mëngjes. Pajisjet e nevojshme janë siguruar dhe ndërtesa e ambasadës është zyrtarisht e mbyllur. Në vend ka mbetur vetëm një kujdestar, ndërsa stafi lokal është larguar për arsye sigurie.

Pesë anëtarë të stafit diplomatik kishin lënë Teheranin që të martën, bashkë me familjet e tyre, menjëherë pas vendimit për mbylljen e përkohshme të ambasadës. Të gjithë pritet të udhëtojnë së shpejti për në Zvicër, por mbeten të gatshëm për t’u kthyer në detyrë sapo situata të normalizohet, shkruan RTS.

Zvicra, që prej dekadash luan rolin e një ndërmjetëseje neutrale, ka konfirmuar se do të vazhdojë të përfaqësojë interesat amerikane në Iran. “Zvicra e ruan rolin e saj si ndërmjetëse për transmetimin e komunikimeve që palët i konsiderojnë të dobishme,” u tha në deklaratë, duke sqaruar se të dyja palët: Irani dhe SHBA  janë informuar për masat e marra.

Qeveria zvicerane ka shprehur gjithashtu shqetësimin e saj për përshkallëzimin e situatës dhe ka bërë thirrje për një “kthim urgjent në dialog me qëllim uljen e tensioneve” , transmeton albinfo.ch.