Parlamenti mbështet financimin e pensionit të 13-të përmes rritjes së TVSH-së

Pensioni i 13-të i Sigurimit të Pleqërisë dhe të Mbijetuarve (AHV) në Zvicër do të financohet ekskluzivisht nga një rritje e Tatimit mbi Vlerën e Shtuar (TVSH) prej 0.7 pikë përqindjeje. Kështu ka vendosur Komiteti i Sigurimeve Shoqërore dhe Shëndetit i Këshillit Kombëtar (SGK-N), i cili u rreshtua pas draftit të propozuar nga Këshilli Federal, shkruan SRF, transmeton albinfo.ch.

Fillimisht, Këshilli i Shteteve kishte mbështetur një model të kombinuar  përmes një rritjeje dyfazore të kontributeve nga pagat dhe TVSH-së,  duke e lidhur rritjen e dytë me një rishikim të mundshëm të kufirit të pensioneve për çiftet e martuara. Megjithatë, SGK-N është shprehur se deficitet e ardhshme të AHV pritet të jenë më të ulëta sesa parashikimet fillestare të Këshillit Federal, ndaj rritja e TVSH-së shihet si mjaftueshëm për të siguruar financim kalimtar deri në vitin 2030.

Komisioni ka propozuar gjithashtu që të hiqet ulja e kontributit federal në AHV, e cila ishte paraparë nga Këshilli Federal. Vendimi u mor me 20 vota pro dhe 5 kundër.

Në votimin e përgjithshëm, SGK-N miratoi dy draftet për financimin e pensionit të 13-të me rezultat të ngushtë  13 vota pro dhe 12 kundër. Çështja do të shqyrtohet nga Këshilli Kombëtar në sesionin e vjeshtës, transmeton albinfo.ch.