Lucerni planifikon pagë minimale, por rezistenca kantonale rrit sfidat

Qyteti i Lucernit synon të vendosë një pagë minimale deri në vitin 2026, duke marrë mbështetje nga qeveria dhe parlamenti i qytetit, transmeton albinfo.ch.

Megjithatë, Këshilli Kantonal i Lucernit, i dominuar nga e djathta, ka vendosur se paga minimale duhet të përcaktohet vetëm përmes marrëveshjeve kolektive ose kontratave standarde, duke ndaluar rregullime të veçanta në komunat individuale.

Kritikët e vendimit argumentojnë se ndalimi i kantonit godet autonominë komunale dhe vendime demokratike të qyteteve. Lucerni po ndjek shembullin e Zürich-ut dhe Winterthur-it, ku pavarësisht votës popullore për paga minimale, zbatimi është ende në pritje për shkak të sfidave ligjore.

Qeveria e qytetit të Lucernit thotë se do të monitorojë me kujdes vendimet e Gjykatës Federale për të parë ndikimin mbi zbatimin e pagës minimale në qytet.