Rezistenca ndaj antibiotikëve po rritet edhe në Zvicër

(KEYSTONE/Christian Beutler)

Rezistenca ndaj antibiotikëve po shihet si një nga kërcënimet më të mëdha shëndetësore globale. Ekspertët paralajmërojnë se, nëse nuk merren masa urgjente, deri në vitin 2050 rreth 10 milionë njerëz në botë mund të humbin jetën nga infeksionet që nuk reagojnë më ndaj trajtimit, transmeton albinfo.ch.

Sipas të dhënave federale, situata po përkeqësohet edhe në Zvicër. Infektologu i njohur Manuel Battegay thekson se gjithnjë e më shpesh pacientët nuk reagojnë ndaj antibiotikëve standardë. Ai paralajmëron se ky është një problem serioz që mund të prekë këdo.

Në një intervistë për podcastin «Durchblick», Battegay shpjegon se kërkohen zgjidhje të reja, përfshirë përdorimin e inteligjencës artificiale për zhvillimin e alternativave kundër baktereve rezistente.

Autoritetet shëndetësore dhe ekspertët theksojnë se përdorimi i kujdesshëm i antibiotikëve dhe higjiena e mirë janë hapa kyç për të ngadalësuar përhapjen e rezistencës.