Rreth 1000 të infektuar nga bakteret fekale

Vetëm nga e enjtja e javës së kaluar deri të hënën në qytetin Le Locle të kantonit Neuchatel janë infektuar 800 deri 1000 banorë nga një infeksion zorrësh. Infektimin e kanë shkaktuar bakteret kolike  (me origjinë fekale)që janë zbuluar në ujin e pijes, ndërsa mbetet ende e paqartë se nga kanë arritur ato në këtë ujë.

Siç bën te ditur spitali kantonal i Neuchatelut, deri tash në spitale të ndryshme të regjionit janë trajtuar rreth 80 persona me ankesa të ngjashme. Ndërkaq vetëm njëri nga ta, një pacient i moshuar vazhdon të mbahet ende në spital.

Si masë preventive, qytetarëve u rekomandohet që ujin e ujësjellësit para se ta përdorin ta vlojnë. Ndërsa analizat që janë duke u bërë pritet të tregojnë nëse uji i trajtuar me klor duhet të konsiderohet si i pastër dhe i pijshëm ose jo.

Rezultatet e këtyre analizave priten të jenë të gatshme deri të mërkurën ose të enjten.