Vidmer-Schlumpf kundër vënies në pyetje të themeleve të shtetit

Duhet mbrojtur kundër logjikës që shtyllat kryesore të shtetit tonë të vihen vazhdimisht në pikëpyetje”, citohet të ketë thënë Widmer-Schlumpf

Ministrja federale e financave, Eveline Widmer-Schlumpf është hedhur në sulm kundër atyre që sipas saj kritikojnë pa arsye dhe në mënyrë të vazhdueshme institucionet e vendit.

“Përpjekja që gjithmonë dhe me çdo kusht të fitojë qëndrimi yt, nuk shkon me sistemin e konkordancës”, ka thënë ajo në një intervistë për gazetën “Schweiz am Sonntag”, të cilën e transmetojnë shumica e gazetave të së dielës.

“Nuk dihet më se çfarë funksionon e çfarë jo në sistemin tonë. Debatet shkojnë gjithmonë në drejtim të kritikës së pa kritere. Nëse institucioneve gjithmonë u potencohet se po punojnë keq, kjo dikur mund të rezultojë me një efekt destabilizues. Andaj duhet mbrojtur kundër logjikës që shtyllat kryesore të shtetit tonë të vihen vazhdimisht në pikëpyetje”, citohet të ketë thënë Widmer-Schlumpf.

Pyetjes nëse me këtë i referohet SVP-së gjegjësisht eksponentëve të kësaj partie, ministrja i është përgjigjur se nuk i interesojnë emrat dhe personat. Por, fakti se SVP-ja po bën kaq shumë zhurmë rreth azilit dhe madje po bën thirrje për rezistencë, sipas saj ka të bëjë shumë me zgjedhjet nacionale që mbahen në tetor.