Winterthuri trajnon mësuesit kundër radikalizmit islamik

Departamenti arsimor i këtij qyteti ka vendosur të angazhojë ekspertë nga jashtë që do të identifikojnë rrezikun e radikalizimit në shkolla

Qytetit Winterthur i Kantonit të Cyrihut, muajve të fundit i ka dalë zëri si “çerdhe” rekrutimi për luftëtarët e ISIS-it. Këtë epitet e ka marrë pasi që prej këtu janë nisur për në Siri, për të luftuar për “Shtetin Islamik”së paku pesë të rinj të këtushëm.

Nisur nga kjo, autoritetet e qytetit kanë marrë një sërë masash kundër kësaj dukurie. Kështu, Departamenti arsimor i këtij qyteti ka vendosur të angazhojë ekspertë nga jashtë që do të identifikojnë rrezikun e radikalizimit në shkolla.

“Me ndihmën e ekspertëve synohet t`i dilet përballë këtij fenomeni të ri shoqëror”, ka thënë për televizionin  TeleZüri përgjegjësi i arsimit në këtë qytet, Stefan Fritschi. Detyrë  e këtyre ekspertëve, ka thënë ai, është që të njohin me këtë përmbajtje mësuesit e të gjitha shkallëve.

Arsimtarët do të mësojnë kështu të dallojnë me kohë te nxënësit shenjat e radikalizmit. Ndër këto shenja është kur një vajzë vjen papritur në shkollë e mbuluar me shami ose kur një djalë refuzon t`ia japë mësueses dorën për t`u përshëndetur.

Trajnimet e para do të fillojnë në shtator.