Zvicër: 7 veta humbin jetën në male gjatë vikendit

Seria e aksidenteve me fund tragjik në malet zvierane ka filluar të premten

Foto: KEYSTONE

Fundjava që shkoi, ka qenë fatale për shtatë alpinistë në Zvicër. Moti shumë i mirë e me diell ka joshur gjatë dy ditëve të kaluara shumë zviceranë për t`u ngjitur maleve ose për të shëtitur. Por për 7 prej tre kjo ka përfunduar tragjikisht.

Seria e aksidenteve me fund tragjik ka filluar të premten, kur, në regjionin rreth majës së njohur të malit Matterhorn dhe në Weissmies kanë humbur jetën dy persona. Të shtunën në Tächhorns të kantonit Valis një alpinist ka rrëshqitur duke rënë në një greminë me ç`rast ka humbur jetën.

Të shtunën ka humbur jetën edhe një alpinist në Gspaltenhorn dhe një tjetër në Girenspitz në Wildhaus të Kantonit St. Gallen. Po atë ditë në majën e njohur Pilatus, afër Lucernit një person është përplasur në një shkëmb dhe për pasojë ka gjetur vdekjen. Një grua që po shëtiste në Dent de Lys, kantoni Freiburg po ashtu ka përfunduar tragjikisht ditën e shtunë.