Zvicra, me hartë të re sizmologjike

Zona më e rrezikuar nga tërmetet mbetet edhe më tutje kantoni Valis. Pas tij vijnë Bazeli, Graubündeni, regjioni Rheintal i Kantonit St. Gallen dhe Zvicra qendrore

Shërbimi sizmologjik i Zvicrës ka prezantuar sot hartën që tregon shkallën e rrezikshmërisë për tërmete sipas regjioneve të vendit. “Modeli i rrezikshmërisë nga tërmetet” i publikuar sot dallon zonat me ngjyra: nga ngjyra e verdhë që tregon rrezikshmëri të ulët deri te tonet e të kuqes së ndezur, shenjë për rrezikun e lartë.

Ndryshe nga harta e vjetër, e punuar në vitin 2004, këtu nuk ka më ngjyrë të gjelbër që do të shënonte hapësirat e parrezikuara nga tërmetet.

Përpiluesit e kësaj harte ose modeli kanë konstatuar se vetëm në kantonin Graubünden, e në veçanti në regjionin e tij Engadin rrezikshmëria nga dridhjet e tokës është më e madhe se sa që ishte menduar deri tash.

Ndërkaq zona më e rrezikuar mbetet edhe më tutje kantoni Valis. Pas tij vijnë Bazeli, Graubündeni, regjioni Rheintal i Kantonit St. Gallen dhe Zvicra qendrore.