Bëhet më vështirë për udhëtarët pa bileta

Ata që shfrytëzojnë trenin ose mjetet tjera të transportit publik pa pasur biletën përkatëse nga një janari 2016 do të rrezikojnë edhe më shumë se deri më tash. Emrat e tyre do të regjistrohen në regjistra unikë në nivel nacional.

Këshilli Federal ka vendosur që ligji i rishikuar për transportin publik të hyjë në fuqi më 1 janar 2016. Me ligjin e ri ndërmarrjet e transportit publik do të pajisen me bazën juridike që emrat e personave të kapur pa biletë të vlefshme ose abonament të rregullt t`i fusin në regjistrin nacional, njofton srf.ch. Sigurisht, të dhënat nga ky regjistër do të shlyhen pas dy vitesh në rast se bileta dhe dënimi ose shtesa e pagesës është paguar me rregull.

Falë këtij regjistri personat recidivistë (ata që kanë bërë shkelje në mëmë të përsëritur) do të identifikohen më lehtë dhe do të detyrohen të paguajnë dënimet.