Levrat: T`i ndalohet hyrja në Zvicër kryeministrit hungarez, Orban

Ndalimi i hyrjes së Orbanit në Zvicër dhe bllokimi i pagesës së fondit të kohezionit që bën Zvicra për Hungarinë, janë disa nga masat që propozon Levrat

Qëndrimi i ngurtë i Hungarisë zyrtare ndaj refugjatëve ka ngjallur reagime në shumë qarqe në perëndim. Shumica e dënojnë sjelljen e qeverisë së Viktor Orbanit për ngritjen e gardhit prej telave me gjemba përgjatë tërë kufirit me Serbinë për ndalimin e hyrjes së refugjatëve në Hungari.

Deklarimi i fundit i kryeministrit hungarez kundër pranimit të refugjatëve me pretekstin se ata janë myslimanë dhe rrezikojnë substancën e krishterë të vendit të tij ka shkaktuar reaksion edhe më të madh, gjithandej, edhe në Zvicër.

Kryetari i Partisë Socialdemokrate të Zvicrës Christian Levrat me këtë rast ka kërkuar qëndrim refuzues të shtetit të Zvicrës ndaj Hungarisë. Ndalimi i hyrjes së Orbanit në Zvicër dhe bllokimi i pagesës së fondit të kohezionit që bën Zvicra për Hungarinë, janë disa nga masat që propozon Levrat.

“Për sa kohë që Orban nuk u përmbahet të drejtave të njeriut, Zvicra duhet që paratë për Hungarinë t`i paguajë në një konto të bllokuar”, ka thënë Christian Levrat në një intervistë dhënë gazetës “SonntagsBlick”. Në vend se t`i jepen shtetit hungarez këto para duhet t`i jepen organizatave që bëjnë sigurimin e rrugëve të refugjatëve. Një pjesë e madhe e përgjegjësisë për kaosin e refugjatëve në Ballkan bie mbi Hungarinë”, ka thënë ai.