Ekstradohet nga Zvicra në Kosovë një i kërkuar për vjedhje të rëndë

Një shtetas i Kosovës, i identifikuar me inicialet K.B., është ekstraduar sot nga Zvicra në Kosovë, pasi kërkohej me letërarrestim ndërkombëtar për veprën penale “Vjedhje e rëndë”.

Sipas njoftimit të Policisë së Kosovës, ekstradimi është realizuar nga Drejtoria për Bashkëpunim Ndërkombëtar Policor, në koordinim me njësitë përkatëse të Policisë së Kosovës, institucionet e drejtësisë dhe autoritetet zvicerane.

I dyshuari ishte arrestuar në Zvicër në bazë të një letërarrestimi ndërkombëtar të lëshuar nga institucionet e drejtësisë së Kosovës përmes INTERPOL-it.

Policia bën të ditur se ekstradimi është zhvilluar në përputhje me legjislacionin në fuqi dhe si rezultat i bashkëpunimit ndërinstitucional ndërmjet Republikës së Kosovës dhe Zvicrës. Pas kthimit në Kosovë, i dyshuari u është dorëzuar njësive kompetente policore për vazhdimin e procedurave ligjore.

Policia e Kosovës ka theksuar se Drejtoria për Bashkëpunim Ndërkombëtar Policor do të vazhdojë bashkëpunimin me institucionet vendore, shtetet partnere dhe organizatat ndërkombëtare, me qëllim të parandalimit, hetimit dhe zbulimit të veprave penale, si dhe identifikimit, gjurmimit dhe arrestimit të personave dhe grupeve kriminale që veprojnë brenda dhe jashtë vendit/albinfo.ch/