Një shtetas suedez është ekstraduar nga Kosova drejt Suedisë, pasi kërkohej me urdhërarrest ndërkombëtar për përfshirje në vepra të rënda penale të lidhura me narkotikët, njofton Policia e Kosovës, transmeton albinfo.ch.
Sipas njoftimit zyrtar, urdhërarresti ishte lëshuar nga institucionet e drejtësisë së Suedisë, ndërsa ekstradimi u realizua më 21 tetor 2026 nga Drejtoria për Bashkëpunim Ndërkombëtar Policor, në koordinim me njësitet përkatëse të Policisë së Kosovës dhe institucionet e drejtësisë.
Policia nuk ka bërë të ditur identitetin e personit të ekstraduar dhe as detaje të tjera lidhur me veprat penale për të cilat kërkohej.
Ekstradimi u mundësua përmes bashkëpunimit ndërmjet institucioneve të Kosovës dhe atyre suedeze. Policia ka bërë të ditur se do të vazhdojë bashkëpunimin dhe shkëmbimin e informacioneve me institucionet vendore dhe ndërkombëtare për parandalimin dhe hetimin e veprimtarive kriminale, si dhe për gjurmimin dhe arrestimin e personave të kërkuar./Albinfo.ch
