Kryeministri i Kosovës, Albin Kurti, është takuar me kancelarin federal të Austrisë, Christian Stocker, në Shën Stefan, ku kanë diskutuar për prioritetet e Qeverisë së Kosovës në mandatin e ri dhe thellimin e bashkëpunimit dypalësh, përcjell albinfo.at.
Përmes një postimi, Kurti bëri të ditur se një ndër temat kryesore të takimit ishte bashkëpunimi ekonomik në sektorët e energjisë, hekurudhave dhe teknologjisë digjitale. Sipas tij, kompanitë austriake dhe diaspora kosovare po rrisin investimet në këta sektorë.
Kurti rikujtoi edhe takimin e mëparshëm me kancelarin austriak, të mbajtur katër muaj më parë, kur kishin diskutuar për integrimin e Kosovës në Zonën e Vetme të Pagesave në Euro (SEPA) dhe përfshirjen në zonën e roamingut të Bashkimit Evropian.
Ai tha se Kosova e ka përmbushur edhe kushtin e fundit për SEPA-n, përmes miratimit të tërësisë së ligjeve të nevojshme, ndërsa pret që negociatat për roamingun të nisin së shpejti.
Duke folur për perspektivën evropiane, Kurti theksoi se pajtohet me qëndrimin e kancelarit austriak se Bashkimi Evropian nuk mund të jetë i plotë, i sigurt dhe i qëndrueshëm pa Ballkanin Perëndimor. Ai kërkoi që vendet kandidate të trajtohen në mënyrë të barabartë dhe në bazë të meritave.
“Në bazë të meritës, Republika e Kosovës është gati për avancim në rrugën evropiane, statusin e vendit kandidat dhe hapjen e negociatave”, shkroi Kurti.
Në fund të postimit, kryeministri iu referua edhe futbollit, duke rikujtuar rezultatet e ndeshjeve mes Kosovës dhe Austrisë.
“Pas 3:1 në Vjenë dhe 1:1 në Prishtinë, po afrohemi edhe në futboll”, përfundoi Kurti./Albinfo.ch
