Mbi 150 studentë shqiptarë ndjekin studimet në degë të ndryshme të Universitetit të St. Gallenit, një nga institucionet e arsimit të lartë në Zvicër, shkruan albinfo.ch.
Gjatë një vizite në St. Gallen, ambasadori i Shqipërisë në Zvicër, Ermal Dredha, dhe drejtoresha e Përgjithshme e Agjencisë Kombëtare të Turizmit, Jola Hysaj, u pritën nga studentët shqiptarë, të cilët i shoqëruan në një vizitë njohëse në universitet.
Gjatë takimit, të ftuarit patën mundësi të njiheshin më nga afër me historinë e institucionit, mjediset universitare dhe programet e ndryshme të studimit që ofrohen aty.
Vizita shërbeu gjithashtu si një mundësi për të forcuar lidhjet me studentët shqiptarë në Zvicër dhe për të vlerësuar rolin e tyre në krijimin e urave të reja të bashkëpunimit ndërmjet Shqipërisë dhe Zvicrës.
Njohuritë dhe përvojat e fituara nga të rinjtë shqiptarë në universitetet zvicerane përbëjnë një mundësi për shkëmbim përvojash dhe zhvillimin e bashkëpunimit në fusha të ndryshme./Albinfo.ch
