Deputeti i zgjedhur në Kuvendin e Serbisë, Shaip Kamberi, ka vënë në pikëpyetje nëse Lista Studentore do të sjellë një ndryshim në qëndrimet politike ndaj Kosovës pas formimit të qeverisë së re në Serbi. Sipas tij, zhvillimet e ardhshme do të tregojnë nëse kjo listë do të vazhdojë kursin e deritanishëm apo do të rishikojë qasjen ndaj Prishtinës, përcjell albinfo.ch.
Kamberi ka theksuar se elektorati nacionalist vazhdon të ketë ndikim të rëndësishëm në politikën serbe, duke e bërë çështjen e Kosovës një temë të shpeshtë në fushatat dhe debatet politike në Serbi.
Ai ka vlerësuar se Lista Studentore, e cila përfshin akademikë dhe profesorë, duhet të reflektojë mbi qëndrimet e deritanishme të Beogradit dhe të shqyrtojë mundësinë e një kursi tjetër politik.
“Do të shohim pasi të krijohet qeveria e re, a do ta mbajnë vijën e njëjtë apo do të ketë ndryshim në qasje”, ka deklaruar Kamberi.
Sipas tij, pretendimet e presidentit serb, Aleksandar Vuçiq, lidhur me Kosovën janë të parealizueshme, prandaj Serbia duhet ta përshtatë politikën e saj me realitetin e krijuar gjatë 27 viteve të fundit.
“Kosova është shtet i pavarur. Dhe në atë realitet të ndërtojë edhe raporte me Kosovën”, ka theksuar Kamberi.
Deklaratat e tij vijnë në një periudhë kur formimi i qeverisë së re në Serbi dhe orientimi politik i aktorëve të rinj pritet të tregojnë nëse do të ketë ndryshime në qëndrimet e Beogradit ndaj Kosovës. /Albinfo.ch
