Kryetarja e Kuvendit të Kosovës, Albulena Haxhiu, do të zhvillojë sot një vizitë zyrtare në Maqedoninë e Veriut, ku në fokus do të jenë takimet me drejtuesit e institucioneve shtetërore dhe bashkëpunimi ndërmjet dy vendeve fqinje, përcjell albinfo.ch.
Vizita do të nisë me pritjen zyrtare nga kryetari i Kuvendit të Maqedonisë së Veriut, Afrim Gashi, në një ceremoni shtetërore. Pas saj, dy kryeparlamentarët do të zhvillojnë një takim bilateral.
Gjatë qëndrimit në Shkup, Haxhiu do të takohet edhe me presidenten e Maqedonisë së Veriut, Gordana Siljanovska-Davkova, si dhe me kryeministrin Hristijan Mickoski.
Në agjendën e saj janë përfshirë gjithashtu takimet me kryetarët e komunave me shumicë shqiptare në Maqedoninë e Veriut. Programi zyrtar parashikon edhe një vizitë në Muzeun e Artit Bashkëkohor në Shkup.
Kosova dhe Maqedonia e Veriut kanë marrëdhënie diplomatike që nga viti 2008, kur Shkupi njohu pavarësinë e Kosovës. Vizitat dhe takimet institucionale ndërmjet dy vendeve synojnë të mbështesin komunikimin politik dhe bashkëpunimin në fusha me interes të përbashkët./Albinfo.ch
