Deputetja me prejardhje shqiptare në Parlamentin e Kantonit të Bernës, Shasime Osmani, ka marrë shtetësinë e Republikës së Kosovës.
Në një prononcim për albinfo.ch, Osmani thotë se këtë moment e përjeton me nder dhe krenari, duke e lidhur njëkohësisht me angazhimin e saj publik dhe me mundësinë për të kontribuar në afrimin e mëtejshëm mes Kosovës dhe Zvicrës.
„Ndihem shumë e nderuar dhe krenare për marrjen e shtetësisë së Kosovës. Për mua është një moment shumë i veçantë dhe emocional. Shpresoj që të mund të kontribuoj për popullin e Kosovës dhe për forcimin e bashkëpunimit institucional dhe të lidhjeve ndërmjet Kosovës dhe Zvicrës”, është shprehur Osmani për albinfo.ch.
Shtetësia i është dhënë nga Presidentja e Republikës së Kosovës, Justina Shiroka-Pula, ndërsa lajmi është bërë publik më 23 tetor.
Me prejardhje nga Kërçova, Osmani është pjesë e brezit të ri të politikanëve me rrënjë shqiptare të angazhuar në institucionet zvicerane. Në zgjedhjet kantonale të 29 marsit 2026, ajo u zgjodh deputete në Parlamentin e Kantonit të Bernës nga radhët e Partisë Socialdemokrate (SP), duke siguruar 9.641 vota.
Osmani është studente e drejtësisë dhe, para zgjedhjes në parlamentin kantonal, ka qenë anëtare e Parlamentit të qytetit të Bernës. Angazhimi i saj politik përfshin çështje që lidhen me arsimin, mundësitë e barabarta, barazinë gjinore, migracionin dhe përfaqësimin, ndërsa pjesë e prioriteteve të saj është edhe lufta kundër dhunës ndaj grave.
Bashkëpunimi mes Kosovës dhe Zvicrës ka qenë pjesë edhe e angazhimeve të saj institucionale. Më 31 korrik të këtij viti, gjatë një takimi në Prishtinë me kryeministrin në detyrë të Kosovës, Albin Kurti, u diskutua për rëndësinë e arsimit, mundësive të barabarta dhe fuqizimit të grave në politikë, si dhe për bashkëpunimin e afërt mes Kosovës dhe Zvicrës.
Në këtë kontekst, marrja e shtetësisë për Osmanin nuk mbetet vetëm në dimensionin personal. Ajo e sheh atë edhe si një mundësi për ta vazhduar kontributin e saj në ndërtimin e lidhjeve më të afërta ndërmjet dy vendeve.
„Për mua, marrja e shtetësisë së Kosovës ka një domethënie të veçantë personale, por njëkohësisht e shoh edhe si një mundësi për të kontribuar më tej në afrimin dhe forcimin e bashkëpunimit institucional mes Kosovës dhe Zvicrës. Shpresoj që angazhimi im në institucionet zvicerane të mund të shërbejë edhe për një komunikim dhe bashkëpunim më të afërt mes dy vendeve”, shprehet Shasime Osmani për albinfo.ch.
