Kryeministri i Kosovës, Albin Kurti, ka pritur të martën në Prishtinë përfaqësues të subjekteve politike shqiptare nga Presheva, Medvegja, Bujanoci dhe Pazari i Ri, pas zgjedhjeve parlamentare të mbajtura në Serbi më 25 tetor, përcjell albinfo.ch.
Në takim morën pjesë drejtues politikë, aktivistë dhe përfaqësues shqiptarë, të cilët në këto zgjedhje garuan së bashku përmes listës “Koalicioni Shqiptar”, të udhëhequr nga Shaip Kamberi.
Sipas rezultateve preliminare të Komisionit Republikan Zgjedhor të Serbisë, lista ka marrë 27.670 vota, përkatësisht 0,64 për qind të votave të vlefshme, duke siguruar dy mandate në Kuvendin e Serbisë.
Pas takimit, Kurti e ka cilësuar këtë rezultat si arritjen më të mirë të shqiptarëve në Serbi që nga viti 2000, duke vlerësuar bashkimin e subjekteve politike shqiptare si një hap të rëndësishëm drejt forcimit të përfaqësimit të tyre politik.
Kryeministri ka rikujtuar se bashkëpunimi ndërmjet subjekteve politike shqiptare u konkretizua më 29 shtator në Prishtinë, kur përfaqësuesit e tyre u pajtuan për krijimin e një liste të përbashkët zgjedhore.
Sipas Kurtit, kjo listë ka siguruar 1.233 vota më shumë sesa në zgjedhjet e vitit 2020, kur përfaqësuesit shqiptarë kishin fituar tri mandate parlamentare.
Ai ka theksuar se rëndësia e rezultatit nuk duhet të matet vetëm me numrin e votave dhe mandateve, por edhe me mundësinë për të adresuar problemet me të cilat përballen shqiptarët në Serbi.
Në këtë kontekst, Kurti ka përmendur pasivizimin e adresave, mosnjohjen e diplomave, përfaqësimin e pamjaftueshëm në institucionet publike, diskriminimin ekonomik dhe emigrimin si çështje që, sipas tij, kërkojnë angazhim të vazhdueshëm politik.
Ai u ka bërë thirrje përfaqësuesve shqiptarë që bashkëpunimin e arritur para zgjedhjeve ta vazhdojnë edhe pas sigurimit të mandateve parlamentare, duke e konsideruar atë si bazë për një angazhim më të koordinuar në mbrojtje të të drejtave të komunitetit shqiptar.
“Dy mandatet janë arritje e përbashkët, e mbi të gjitha, janë edhe përgjegjësi e përbashkët. Aty ku janë mundësitë më të mëdha, edhe përgjegjësia është më e madhe”, ka shkruar Kurti.
Lista “Koalicioni Shqiptar” u krijua përmes bashkimit të tetë subjekteve politike shqiptare nga Lugina e Preshevës, me synimin për të forcuar përfaqësimin e shqiptarëve në institucionet qendrore të Serbisë.
Rezultatet e zgjedhjeve mbeten preliminare deri në përfundimin e procedurave përkatëse dhe shpalljen e rezultateve përfundimtare nga autoritetet zgjedhore serbe. /Albinfo.ch
