Gjyqtarët dhe prokurorët në Shqipëri kanë kërkuar ndalimin e ndërhyrjeve politike dhe sulmeve ndaj magjistratëve, pas publikimit të raportit të Komisionit Evropian për vitin 2026, përcjell albinfo.ch.
Unioni i Gjyqtarëve të Shqipërisë, Shoqata Kombëtare e Gjyqtarëve dhe Shoqata e Prokurorëve kanë reaguar përmes një deklarate të përbashkët, duke kërkuar zbatimin pa vonesë të rekomandimeve të institucioneve evropiane.
Organizatat vlerësojnë përparimin e arritur në reformën në drejtësi, por shprehin shqetësim për përpjekjet e zyrtarëve publikë dhe politikanëve për të ndikuar në institucionet gjyqësore, përfshirë sulmet personale ndaj magjistratëve.
Një tjetër shqetësim lidhet me sigurinë e gjyqtarëve dhe prokurorëve. Sipas deklaratës, aktualisht tetë magjistratë janë vendosur në mbrojtje, gjashtë prokurorë dhe dy gjyqtarë.
Në reagim përmendet edhe vrasja e gjyqtarit Astrit Kalaja në tetor të vitit 2025, pas së cilës, sipas organizatave, nuk janë ndërmarrë masa të mjaftueshme për garantimin e sigurisë së sistemit gjyqësor.
Gjyqtarët dhe prokurorët kërkojnë gjithashtu që reforma e pagave të realizohet në konsultim me përfaqësuesit e drejtësisë, si dhe të përmirësohen kushtet e punës dhe kapacitetet njerëzore e teknike të institucioneve.
Ata theksojnë se pavarësia e drejtësisë nuk mund të garantohet pa mbrojtjen e magjistratëve nga presionet dhe pa krijimin e kushteve të sigurta për ushtrimin e detyrës.
