A do t’i hapë Kosova kufijtë më 1 qershor

Pas 1 qershorit, kur edhe fillon faza e tretë e lehtësimit të masave në Kosovë, pritet që të vendoset për hapjen ose jo të kufijve tokësorë dhe Aeroportit.

Nga Ministria e Shëndetësisë kanë thënë se hapja e kufijve varet nga situata dhe përhapja e pandemisë  COVID-19.

“Rihapja e kufijve pritet të bëhet në fazën e tretë, por varet nga situata e pandemisë COVID19. Po ashtu hapja e kufijve do të bëhet në koordinim edhe me shtetet e rajonit”, kanë thënë nga MSH-ja për Insajderi, përcjell albinfo.ch.

Edhe ministri i Shëndetësisë, Arben Vita, ditë më parë tha se rihapja e kufijve do të bëhet në koordinim me shtetet e tjera si dhe qytetarët do të njoftohet me kohë.

“Po mendoj që në fund të kësaj faze, apo në fillim të fazës tjetër nuk do të varet veç nga ne, por edhe nga shtetet e tjera, të rajonit dhe më gjerë. Përmes mediave qytetarët do të njoftohen me kohë për hapjen e kufijve”, kishte deklaruar Vitia.

Shtete e zonës Shengen pritet që rihapjen e kufijve ta bëjnë nga data 15 qershor, ndërsa shtetet fqinje Shqipëria, Mali i Zi dhe Maqedonia, pritet që nga 1 qershor t’i hapin kufijtë.

---