Aeroplani i parë me turistë ulet në aeroportin e Vlorës më 8 qershor

Photo - Ken Yam

Mediat në Shqipëri vlerësojnë se turizmi për vitin 2025 pritet të ketë një tjetër hov, duke pasur parasysh se në qershor do të nisin fluturimet charter edhe nga Aeroporti i Vlorës, përcjell albinfo.ch.

Lajmet e mediave gjermane për largimin e Aeroportit të Mynihut nga pozicioni i Këshillimit të Aeroportit të Vlorës, sipas kreut të Unionit Turistik Shqiptar, Rrahman Kasa, nuk janë shqetësuese.

“Nga informacionet dhe kontaktet është thënë se do të operojë vetëm për avionët charter. Aeroporti i Mynihut është thjesht këshillues në fund të fundit. Autoriteti i Aviacionit Civil është institucioni kompetent për të certifikuar, me shpresën se Aeroporti i Vlorës do të hapet. Kemi futur katër avionë charter në javë, duke u bazuar në premtimet e dhëna nga autoritetet se Aeroporti i Vlorës do të jetë funksional për verën e vitit 2025. Charter-at e parë pritet të zbresin më 8 qershor,” u shpreh kreu i Unionit Turistik Shqiptar, Rrahman Kasa.

Referuar Kasës, kontratat nga tur-operatorët për të fluturuar charter-at drejt Vlorës janë lidhur prej kohësh dhe një pjesë e pagesave është kryer.

“Janë kontrata të parapaguara, pra një përqindje e këtyre kontratave është paguar paraprakisht. I kemi vënë në dijeni edhe autoritetet. Këto janë charter-a të kontraktuara nga tur-operatorët ndërkombëtarë, të cilët do të sjellin turistë nga Republika Çeke dhe Polonia,” shpjegoi më tej Kasa.

Numri i turistëve në Shqipëri, sipas Kasës, duke pasur parasysh rezervimet, do të ndjekë të njëjtin ritëm rritjeje si në vitin e kaluar.

“Edhe ky vit do të karakterizohet nga një rritje të tillë, nga 15 deri në 20 për qind. Kjo e bazuar në rezervime dhe kontrata. Po ashtu edhe në turizmin tjetër, pra turizmin e paorganizuar, i cili, megjithëse jo i kontraktuar, ka ndjekur të njëjtin trend rritës,” përfundoi Kasa.

Gjatë vitit 2024, Shqipëria u vizitua nga 11.7 milionë turistë, ndërkohë që të ardhurat nga turizmi arritën në gati 5 miliardë euro.