Aksident i rëndë në Shqipëri, humbasin jetën 8 persona

Dyshohet se shkak për aksidentin ka qenë shpejtësia tej normave të lejuara

Detaje të reja kanë dalë në dritë nga aksidenti i rëndë me 8 viktima që ndodhi në orët e para të mëngjesit të së martës në aksin rrugor Këlcyrë-Përmet në Shqipëri, transmeton albinfo.ch.

Pamjet ishin të rënda, ku makina me 7 klandestinë nga vendet e treta dhe shoferi shqiptar përfunduan 200 metra në rrëpirë, poshtë rrugës nacionale.

Dyshohet se shkak për aksidentin ka qenë shpejtësia tej normave të lejuara.

Grupi hetimor ndodhet në vendngjarje dhe po vijon punën për nxjerrjen e dy trupave që ndodhen ende në makinë.

“Në sfond duket makina e shkatërruar plotësisht. Ekspertët hetimorë po vijojnë punën për zbardhjen e rrethanave dhe shkaqeve të aksidentit. Aksidenti ka ndodhur rreth orës 04:00 duke u gdhirë dita e martë. Në makinë kanë qenë 8 persona, bashkë me shoferin. Makina ka dalë nga rruga në afërsi të fshatit Kuqar, afër Këlcyrës. Automjeti i ka marrë personat pasi ata kanë hyrë në Shqipëri nga kufiri i gjelbër në zonën e Çarçovës. Grupi i klandestinëve nga vendet e treta ka ardhur nga Greqia, ku ka hyrë në Shqipëri pasi kaluan malin në zonën e Çarçovës. Pasi kaluan kufirin me këmbë kanë dalë në rrugën kryesore, ku kanë hipur në automjetin që u aksidentua. Për të shmangur kontrollet e policisë mjeti ka lëvizur me shpejtësi tej normave të lejuara. Grupet po punojnë për nxjerrjen e 2 trupave që janë ende në makinë. Bëhet fjalë për një distancë 150 deri në 200 metra nga rruga, siç e shihni mjeti ka dalë nga rruga dhe ka përfunduar në rrëpirë, anës Vjosës”, tha gazetari i Eurnews Albania nga vendi i ngjarjes.

 

---