Presidenti i Shteteve të Bashkuara të Amerikës, Donald Trump, ka deklaruar se do ta pranojë rezultatin e zgjedhjeve të mesmandatit, në të cilat demokratët kanë siguruar kontrollin e Kongresit amerikan, përcjell albinfo.ch.
Në një intervistë për “Fox News”, Trump ka përgëzuar demokratët për rezultatet e arritura, duke vlerësuar angazhimin e tyre gjatë fushatës.
“Demokratët bënë një punë të mirë. Ata luftuan shumë”, ka deklaruar presidenti amerikan.
Trump gjithashtu i ka thënë gazetës “The New York Times” se është plotësisht i gatshëm ta pranojë rezultatin e zgjedhjeve dhe se pret të bashkëpunojë me demokratët në çështje të ndryshme.
Megjithatë, ai nuk e ka konsideruar humbjen e republikanëve si një goditje ndaj presidencës së tij.
“Unë nuk e shoh këtë si një goditje ndaj meje”, ka deklaruar Trump, duke shtuar se, sipas tij, Shtetet e Bashkuara kanë pasur “dy vitet më të mira në historinë e presidencës”.
Disa kandidatë republikanë, të mbështetur publikisht nga Trump, kanë humbur garat në shtete ku presidenti kishte fituar bindshëm në zgjedhjet presidenciale të vitit 2024.
Trump ka fajësuar kandidatët për rezultatet e dobëta, duke mos pranuar se politikat e administratës së tij, përfshirë ekonominë dhe luftën me Iranin, kanë ndikuar në votën e qytetarëve.
Megjithatë, ai ka pranuar se konflikti me Iranin mund të ketë ndikuar në rezultatin zgjedhor, veçanërisht për shkak të rritjes së çmimeve të karburanteve.
Fitorja e demokratëve në të dy dhomat e Kongresit do ta ndryshojë ndjeshëm raportin e forcave politike në Uashington. Gjatë dy viteve të fundit të mandatit të Trumpit, ata do të kenë mundësi më të mëdha për të ndikuar në legjislacion dhe për të ushtruar mbikëqyrje ndaj administratës presidenciale./Albinfo.ch
