Arbëreshët e Kalabrisë sjellin traditën shqiptare në një mbrëmje kulturore në Gjenevë

Një mbrëmje arbëreshe në Gjenevë me këngë, histori dhe identitet shqiptar

Një mbrëmje e veçantë kushtuar kulturës arbëreshe u mbajt më 7 mars 2026 në Geneva, në sallën e Universitetit të Kulturave në Gjenevë, ku shqiptarë nga treva të ndryshme u mblodhën për të përjetuar një takim kulturor me arbëreshët e Calabria, transmeton albinfo.ch.

Programi u hap me Himnin e Flamurit Kombëtar, i interpretuar nga sopranoja Fjolla Hiseni, duke krijuar një moment solemn dhe emocional për të pranishmit. Aktiviteti u moderua nga drejtoresha e institucionit, Albana Krasniqi Malaj, e cila theksoi se kjo mbrëmje ishte një takim me historinë dhe identitetin shqiptar.

Në pjesën e parë të programit u zhvillua një diskutim mbi rëndësinë e gjuhës amtare dhe rolin e saj në ruajtjen e identitetit në diasporë. Në këtë aktivitet morën pjesë edhe Ermal Dredha, ambasador i Shqipërisë në Bernë, si dhe Fjolla Haziri, zëvendëskonsulle e Kosovës në Gjenevë, të cilët theksuan rëndësinë e ruajtjes së gjuhës dhe kulturës shqiptare ndër breza.

Në diskutim kontribuan gjithashtu Leonard Ferati dhe Ilir Kurti, të cilët folën për rëndësinë e gjuhës amtare në edukimin dhe integrimin e brezave të rinj në diasporë.

Pjesa e dytë e mbrëmjes u përqendrua në programin artistik arbëresh. Profesori Michele Greco prezantoi historinë e emigrimit të arbëreshëve dhe ruajtjen e gjuhës shqipe ndër shekuj, duke theksuar se edhe sot në Kalabri ekzistojnë rreth 35 fshatra ku flitet arbërishtja.

Në skenë performuan grupet artistike “Ocarina” nga Gjeneva, “Gjaku i Arbërit” nga Frasnita dhe “Këngëtarët e Motit” nga Ungra dhe Fërma në Itali, duke sjellë këngë dhe valle tradicionale arbëreshe.

Mbrëmja përfundoi me interpretimin e këngëve shqiptare, ku publiku u bashkua spontanisht me artistët, duke krijuar një atmosferë emocionale që dëshmoi se gjuha dhe kultura shqiptare vazhdojnë të jetojnë dhe të ruhen edhe larg atdheut./Albinfo.ch

---