Arijoni promovohet në ekipin e parë të Bayern Munichut

Mesfushori me prejardhje nga Kosova rikthehet pas huazimit te Heidenheim dhe do të jetë nën urdhrat e Vincent Kompanyt në sezonin e ri

Një tjetër futbollist me rrënjë nga Kosova ka hedhur një hap të rëndësishëm në karrierën e tij. Mesfushori ofensiv Arijon Ibrahimoviq është promovuar në ekipin e parë të FC Bayern Munich për sezonin e ri, transmeton albinfo.ch.

20-vjeçari rikthehet në Mynih pas një periudhe të suksesshme huazimi te 1. FC Heidenheim, ku zhvilloi 34 ndeshje, realizoi dy gola dhe kontribuoi me pesë asistime.

Në sezonin e ri, Ibrahimoviq do të jetë nën drejtimin e trajnerit Vincent Kompany, me synimin për të fituar një vend në formacionin e kampionit të Gjermanisë.

Drejtori sportiv i Bayernit, Christoph Freund, vlerësoi progresin e futbollistit, duke theksuar se rrugëtimi i tij nga akademia deri te ekipi i parë përfaqëson një shembull të punës së vazhdueshme dhe planifikimit afatgjatë të klubit.

Ibrahimoviq ka kontratë me Bayernin deri në vitin 2028 dhe në sezonin e ri do të mbajë fanellën me numrin 22.

Promovimi në ekipin e parë i hap atij mundësinë të debutojë edhe në ndeshjet e UEFA Champions League me klubin bavarez, duke shënuar një tjetër moment të rëndësishëm në karrierën e futbollistit me prejardhje nga Kosova./Albinfo.ch

---