Arrihet marrëveshja Kosovë-Serbi për letërnjoftimet

Serbia u pajtua të heq dokumentet e hyrje-daljeve në mënyrë që edhe Kosova t'i lejojë serbët të qarkullojnë me letërnjoftime

Përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, ka konfirmuar se është arritur marrëveshja mes Kosovës e Serbisë për lëvizjen e lirë.

“Sipas dialogut të lehtësuar nga BE-ja, Serbia ra dakord të shfuqizojë dokumentet e hyrjes/daljes për mbajtësit e letërnjoftimeve të Kosovës dhe Kosova u pajtua që të mos i prezantojë ato për mbajtësit e letërnjoftimeve serbe”, ka shkruar Borrell në Twitter, transmeton Albinfo.ch.

“Serbët e Kosovës, si dhe të gjithë qytetarët e tjerë, do të mund të udhëtojnë lirshëm ndërmjet Kosovës dhe Serbisë duke përdorur letërnjoftimet e tyre. BE-ja sapo mori garanci nga kryeministri Kurti për këtë. Kjo është një zgjidhje evropiane. Ne i përgëzojmë të dy liderët për këtë vendim dhe udhëheqjen e tyre”, theksoi Borrell.

---