Austri: 55 për qind e të anketuarve përkrahin vaksinën e detyrueshme

Shumica e austriakëve mbështesin vaksinimin e detyrueshëm, i propozuar ditë më parë nga qeveria austriake.

Sipas një sondazhi në internet nga Instituti Gallup, 55 për qind e të anketuarve janë pajtuar me propozimin e qeverisë për vaksinim të detyrueshëm të popullsisë, 40 për qind e refuzojnë atë dhe pesë për qind nuk janë përgjigjur.

Në këtë anketim morën pjesë 1,000 persona  të moshës mbi 16 vjeç, raporton orf.at, përcjell albinfo.at.

Sipas Gallup, kjo është hera e parë që shumica e popullsisë pajtohet me një kërkesë të përgjithshme vaksinimi. Në korrik ishte në 24 për qind, në mes të nëntorit në 46 për qind, thuhej me tej në raportin e sondazhit.

Kur u pyetën për vënien e masave të bllokimit edhe për personat e pavaksinuar, i cili me gjasë do të vazhdojë të zbatohet edhe pas 12 dhjetorit, ky vendim shihet nga 62 për qind e të anketuarve nga të gjitha sferat e jetës si “plotësisht i saktë” ose “i saktë”.

Ndërkohë, turbullirat e fundit të masave ndaj Covid-19 të vendosura nga qeveria austriake, kanë dobësuar besimin e popullsisë ndaj qeverisë. Derisa në mars të vitit 2020, 85 për qind kishin besim në menaxhimin e krizës me pandeminë, tani kjo shifër është vetëm 19 për qind.

---