Austri: Konfirmohet rasti i parë i variantit “Omikron”

Të hënën në mëngjes, ministria e Shëndetësisë së Austrisë konfirmoi rastin e parë të variantit të koronavirusit Omikron në këtë vend.

Varianti i  ri i koronavirusit ka mbërritur edhe zyrtarisht në Austri, saktësisht në rajonin e Tirolit. Një person i cili kishte hyrë në Austri nga Afrika e Jugut, ka rezultuar pozitiv, ka njoftuar ministria e Shëndetësisë, përcjell albinfo.at.

“Tani kemi të gjitha rezultatet që nevojiten për të konfirmuar se rasti i dyshuar ditën e shtunë tek personi nga Tiroli, është saktësisht varianti me emërtimin shkencor B.1.1.529. Raste të tjera të dyshuara janë duke u hetuar në Voralberg, në rajonin e Austrisë së Epërme dhe në Salzburg”, thuhet në njoftimin e ministrisë së Shëndetësisë, raporton vienna.at.

Të premten, Austria mbylli kufijtë e saj për udhëtarë nga shtatë vende në pjesën jugore të kontinentit afrikan për shkak të zbulimit të variantit Omikron në Afrikën Jugore.

---