Britania e Madhe tregon sa emigrantë shqiptarë ka dëbuar për 5 muaj

KEYSTONE

Në operacionin e quajtur “Bridora”, Britania e Madhe tash e 5 muaj ka nisur dëbimin e emigrantëve shqiptarë.

Që nga muaji dhjetor i vitit të kaluar mbi 1000 shtetas shqiptarë janë dëbuar drejt Shqipërisë përmes avionëve të posaçëm çarter.

Me këtë rast, Ambasada e Britanisë së Madhe në Tiranë shpërndau një deklaratë të përbashkët Shqipërisë-Mbretëri e Bashkuar, mbi punën e agjencive ligjzbatuese për të adresuar problemin e migracionit të paligjshëm.

Në të bëhet e ditur se autoritetet shqiptare dhe britanike po punojnë së bashku për të parandaluar hyrjen dhe qëndrimin e paligjshëm të emigrantëve ilegalë në Britaninë e Madhe.

“Që nga nënshkrimi i Komunikatës, mbi 1 000 shtetas shqiptarë janë kthyer në Shqipëri. Këto të dhëna përfshijnë shtetas që kanë depozituar kërkesa të pabazuara azili, shkelës të ligjit, si dhe kthime vullnetare, për periudhën nga 13 dhjetori i vitit 2022 deri në javën e parë të prillit 2023”, thuhet në njoftim.