Britania vendos masa kundër një rrjeti në Kosovë për falsifikim dokumentesh dhe trafik njerëzor

KEYSTONE

Qeveria e Mbretërisë së Bashkuar ka vendosur sanksione ndaj një grupi të përfshirë në krim të organizuar në Ballkanin Perëndimor, përfshirë një rrjet në Kosovë, të dyshuar për prodhimin e dokumenteve të falsifikuara të përdorura në trafikun e njerëzve.

Sipas një njoftimi nga autoritetet britanike, “Rrjeti Krasniqi”, i vendosur në Kosovë, drejtonte një laborator të sofistikuar për krijimin e pasaportave, letërnjoftimeve dhe patentave të falsifikuara për më shumë se 50 vende, përfshirë Mbretërinë e Bashkuar.

Personat e sanksionuar përfshijnë Burim, Arif, Flamur dhe Valon K., si dhe disa bashkëpunëtorë të tjerë që dyshohet se kanë ndihmuar në prodhimin dhe shpërndarjen e dokumenteve të falsifikuara. Autoritetet britanike theksuan se ky rrjet kriminal kishte kontribuar në trafikimin e migrantëve ilegalë drejt Mbretërisë së Bashkuar.

Kryeministri britanik Keir Starmer deklaroi se vendi po bashkëpunon me partnerët evropianë për të ndalur këtë rrugë të paligjshme migrimi, duke theksuar rëndësinë e sigurisë rajonale dhe luftës kundër rrjeteve kriminale.

Në janar të këtij viti, Policia e Kosovës kishte zbuluar një laborator në Prishtinë, ku sekuestruan makina laserike, printerë, mbi 20.000 mikroçipa dhe mijëra dokumente të falsifikuara nga 51 vende. Arrestimet e kryera më vonë përfshinin individë të përfshirë në prodhimin dhe shpërndarjen e dokumenteve false, duke përfshirë ndalimin e V.E. në pikën kufitare Bërnjak.

Qeveria britanike tha se këto sanksione janë pjesë e përpjekjeve për të ulur numrin e migrantëve ilegalë nga Ballkani Perëndimor, i cili ka rënë nga 140,000 në vitin 2022 në 21,000 vitin e kaluar.