Celina flet për super golin ndaj Cityt, kritikat dhe golin e parregullt të Agueros

Bersant Celina shënoi një gol shumë të bukur për Swansean në humbjen 2:3 nga Manchester City.

Celina shënoi për rezultatin 0:2 dhe më pas erdhi përmbysja e skuadrës së Pep Guardiola. Futbollisti i Kosovës realizoi ndaj ish-skuadrës, përcjell albinfo.ch.

Ai disa ditë më parë kishte humbur një penallti në mënyrë qesharake.

“Kjo ishte për të gjithë ata që tentuan të më goditin këtë javë dhe jo për Manchester Cityn, të cilin e dua dhe e respektoj shumë. Jam shumë krenar për ekipin tonë”, ka shkruar Celina në llogarinë e tij në Instagram.

City fitoi 2:3, ku goli i Agueros ishte i parregullt, pasi ishte në pozicion jashtë loje.

“Faleminderit tifozëve, ishit të mrekullueshëm. Jam shumë krenar për ekipin. Nuk mund ta besoj se si përfundoi. Të gjithë e dinë çfarë ndodhi dhe unë jam shumë i zhgënjyer. Nuk do të them asgjë tjetër për këtë gjë.

Shpresoj se Manchester City do të fitojë gjithçka këtë sezon. Çfarë ekipi i mrekullueshëm”, është shprehur tutje ylli i Kosovës.