Challandes nuk vajton mungesat, optimist për sfidën me Malin e Zi

Valon Berisha, Hekuran Kryeziu dhe Herolind Shala janë mungesa të sigurta, derisa Ylldren Ibrahimaj dhe Ibrahim Dreseviq nuk kanë marrë leje nga FIFA

Kosova sonte (20:45) është mysafire me Malin e Zi, në kualifikimet për Kampionatin Evropian 2020.

Takimi do të zhvillohet pa shikues, pas koreve raciste të malazezve në ndeshjen me Anglinë, përcjell albinfo.ch.

Kosova do të ketë disa mungesa për këtë sfidë. Valon Berisha, Hekuran Kryeziu dhe Herolind Shala janë mungesa të sigurta, derisa Ylldren Ibrahimaj dhe Ibrahim Dreseviq nuk kanë marrë leje nga FIFA.

Në dyshim është edhe qendërmbrojtësi Amir Rrahmani. “Dresheviq dhe Ibrahimaj, nuk do të paraqiten pasi që ende nuk është kompletuar dokumentacioni i FIFA-s, kurse për Hadergjonaj është gati për të luajtur”, ka thënë Challandes në konferencën për media.

Ai shtoi se kjo ndeshje nuk është aq speciale për Aro Muriq, i cili më herët ka mbrojtur për Malin e Zi.

Trajneri zviceran shtoi se do të luajnë për rezultat pozitiv dhe ka të qartë ekipin që do të luajë, por nuk do të zbulojë.

Kjo është ndeshja e dytë për Kosovën, pas barazimit me Bullgarinë në Prishtinë.

---