Clinton për herë të parë do të vizitojë Shqipërinë

Presidenti i 42-të i Shteteve të Bashkuara të Amerikës, Bill Clinton, do të vizitojë për herë të parë Shqipërinë më 3 dhe 4 korrik 2023

Presidenti i 42-të i SHBA-së, Bill Clinton, viziton nesër Shqipërinë në një qëndrim 24 orësh në Shqipëri, teksa zbardhen disa nga pikat e axhendës së vizitës zyrtare.

Clinton dhe delegacioni që e shoqëron do të mbërrijë në Tiranë ditën e hënë, më 3 korrik, pasdite, ku në orën 19.00 do të pritet nga Kryeministri shqiptar, Edi Rama, në një ceremoni të posaçme zyrtare në Bulevardin “Dëshmorët e Kombit”, përballë Kryeministrisë, me pjesëmarrjen edhe të qytetarëve, përcjell albinfo.ch.

Pas ekzekutimit të himneve kombëtare të SHBA-së dhe Shqipërisë, Kryeministri Edi Rama dhe Presidenti i 42-të i SHBA-së, Bill Clinton, do të bëjnë parakalimin ceremonial dhe do të nderojnë flamujt e dy vendeve.

Në orën 19.05, Rama do të mbajë fjalën e rastit dhe më pas do të ftojë Clinton-in të marrë çmimin e akorduar.

Në orën 19.25 do të zhvillohet ceremonia e nderimit të Presidentit të 42-të të SHBA-së, Bill Clinton, me “Yllin e Mirënjohjes për Arritjet Publike” që do të pasohet nga fjalimi i Presidentit.

 

---