Cyrih: E drejta e të huajve për të votuar kalon pengesën e parë

Por për t`u realizuar kjo e drejtë, nevojitet edhe një votim tjetër po nga Parlamenti i Kantonit si dhe në fund, një votim në favor të iniciativës nga populli, me referendum

E drejta e votës për të huajt në nivelin komunal në Kantonin e Cyrihut ka kapërcyer sot pengesën e parë. Këshilli Kantonal (parlamenti) ka mbështetur përkohësisht  iniciativën përkatëse nga Këshilli i Qytetit i Cyrihut (qeveria) me 87 vota pro, shkruajnë mediat zvicerane sot.

Prezantimin e iniciativës para deputetëve e ka bërë personalisht kryebashkiakja e Cyrihut, Corine Mauch. Ajo ka qenë bartësja kryesore e iniciativës në fjalë, transmeton albinfo.ch. Sipas zonjës Mauch, të huajt, për shkak të kohës së gjatë (10 vjet) që duhet të presin deri në natyralizimin e tyre, janë të penguar të marrin pjesë në jetën politike të vendit. Me këtë, atyre u cenohet një e drejtë e rëndësishme. Për këtë arsye, vendosja e të drejtës së votës në nivel lokal do të ishte një hap i rëndësishëm përpara.

Me këtë iniciativë, në mënyrë të veçantë, komunave duhet t’u jepet mundësia që t`ua ofrojnë të huajve të drejtën e votimit për çështje të nivelit lokal, transmeton albinfo.ch. Kjo do të bëhet me kusht që ata të kenë jetuar në komunën e njëjtë për të paktën dy vjet dhe që të jenë bartës të së drejtës së qëndrimit në Zvicër (Vizës B ose C).

Në mënyrë që komunat të fusin përfundimisht në fuqi të drejtën e votës për të huajt, nevojitet edhe një votim tjetër po nga Parlamenti i Kantonit si dhe në fund, një votim në favor të iniciativës nga populli, me referendum.

E drejta e votës për të huajt në nivel lokal deri më tani është e lejuar në disa kantone, kryesisht në ato të Zvicrës frankofone, shkruan albinfo.ch. Një numër referendumesh në disa kantone të tjera, kanë përfunduar me humbje të iniciativave përkatëse të hedhura në votim.

---