DiCaprio sërish me thirrje që të mbrohen bukuritë natyrore të Shqipërisë

Aktori, Leonardo DiCaprio si dhe një nga të famshmit më aktiv për ndryshimet klimatike në botë, sërish ka bërë thirrje që të mbrohen bukurit e rralla natyrore shqiptare.

Së fundi ai ka bërë thirrje që të mbrohet Lumi Vjosa në Shqipëri, shkruan Gazeta Insajderi, përcjell Albinfo.ch.

DiCaprio në llogarinë e tij në Instagram ka bërë thirrje që të mbrohet dhe të krijohet Parku Kombëtar i Vjosës.

Ai ka shkruar se Vjosa është lumi më i madh i egër në Evropë dhe shtëpia e më shumë se 1 mijë speciave.

“Lumi Vjosa i Shqipërisë është lumi më i madh i egër në Evropë. Nga malet e Greqisë deri në Detin Adriatik në Shqipëri, ai shtrihet në 300 kilometra, plotësisht i lirë nga barrierat artificiale, si digat e hidrocentraleve. Lumenjtë dhe përrenjtë që janë degë të Vjosës janë shtëpia e më shumë se 1,100 specieve të botës së egër, shumë prej të cilave janë të kërcënuara”, ka shkruar DiCaprio në Instagram.

Tutje aktori ka shkruar se “Vjosa është kurora e Zemra e Kaltër e Evropës dhe njerëzit në të gjithë Shqipërinë duan ta mbrojnë atë përgjithmonë. Ata i kërkojnë qeverisë së Shqipërisë të krijojë Parkun Kombëtar Vjosa, i cili do të ishte parku i parë i lumit të egër në Evropë”, ka përfunduar në DiCaprio.