Drejtori i Përfaqësueses së Zvicrës tregon si mund të zbulohen “Xhakat e Shaqirët” e rinj

(KEYSTONE/Laurent Gillieron)

Drejtori i Përfaqësueses së Zvicrës në futboll, Pierluigi Tami, ka bërë analizë të gjatë për rezultatet e Zvicrës së fundmi, por edhe për ato të grupmoshave zinxhirë të ekipit përfaqësues, përcjell albinfo.ch.

Tami në një intervistë dhënë për gazetën zvicerane “Blick” ka theksuar se për t’u arritur rezultatet e dëshiruara, kategoria e dytë e futbollit të Zvicrës duhet të zgjerohet dhe duhet të shtohet numri i futbollistëve profesionistë në skuadra. 

Zvicra rrezikon të bie në Ligën C të Ligës së Kombeve, ndërsa grupmoshat U19 dhe U21 dështuan të kualifikohen në Kampionatet Evropiane. 

“Ka shumë lojtarë të përfaqësueses së Zvicrës që kanë bërë karrierë të suksesshme, edhe pse kanë luajtur në ‘Challenge League’. Ta marrim si shembull Fabian Scharin. Kur e zgjodha për ekipin Olimpik, ai luante te Wili. Askush nuk e njihte atë. Por ai pati suksese. Dhe po bën karrierë të madhe. Manuel Akanji ka luajtur për Winterthurin, kurse Yann Sommeri për Vaduzin. E rëndësishme është që lojtarët të zhvillohen. Nëse sjellim 30 lojtarë në dy ligat profesionale, në vend se t’i sjellim dhjetë, shanset që të kemi lojtarë si Xhaka apo Shaqiri janë gjithmonë më të mëdha”, ka deklaruar Tami. 

Xhaka është kapiten i Zvicrës aktualisht, ndërsa është lojtari me më së shumti paraqitje, 133 gjithsej, e me 14 gola të shënuar. 

Shaqiri është i dyti në këtë listë me 125 paraqitje e me 32 gola të realizuar. 

Që të dy kanë karrierë të madhe edhe si lojtarë.