“Duhet të kthehemi në normalitet”

Sipas këshilltarit federal Maurer, karantina që "është masa që gjeneron barrën më të madhe ekonomike" duhet të hiqet menjëherë

Faza e masave shumë kufizuese për të luftuar Covid-19 duhet të përfundojë së shpejti, beson këshilltari federal Ueli Maurer (UDC), sipas një interviste të publikuar nga Blick. Relaksimet ishin transmetuar tashmë javën e kaluar nga kolegu i tij qeveritar Alain Berset (PS), transmeton albinfo.ch.

I pyetur se cila masë duhet të braktiset më parë, kreu i Departamentit Federal të Financave përmendi karantinën që sipas tij është masa që gjeneron barrën më të madhe ekonomike.

Por Maurer gjithashtu argumenton se pandemia e vërtetë globale ndoshta nuk do të jetë nën kontroll për tre ose katër vjet të tjera. Kjo do të thotë se do të duhet të mendojmë për një strategji vaksinimi. Duke vepruar kështu, përgjegjësia duhet të kthehet nga shteti “te populli, te prindërit, te mjekët e familjes”. Shoqëria është më e ndarë se kurrë, nënvizon Maurer. “Me presionin e shtetit është rritur edhe rezistenca” në popullatë.

Nëse shteti nuk dëshiron të humbasë plotësisht besimin e qytetarëve të tij, “duhet t’i kthehemi shpejt normalitetit”. Maurer mbron një qasje hap pas hapi, e cila duhet të përshpejtohet dhe në të njëjtën kohë duhet të eliminohen disa kontradikta.

---