Edhe emailat kanë vlerë të dokumentit

Falsifikimi i emailit është i dënueshëm edhe kur nuk mban nënshkrim elektronik. Gjykata Federale e Zvicrës ka vërtetuar gjykimin e bërë nga një gjykatë e Bazelandit e cila kishte dënuar një person për falsifikim të dokumenteve të bartura përmes postës elektronike.

Emailat që kishte marrë ai i kishte ndryshuar dhe i kishte dërguar te donatorët e tij duke pasur për qëllim t`i dezinformojë ata për gjendjen e tij financiare. Për këtë ai ishte dënuar me katër vjet e gjysmë heqje lirie. Me vendimin e saj afirmativ, gjykata ka vërtetuar dënimin e përmendur.

Personi i dënuar kishte marrë përmes mashtrimit elektronik plot 6 milionë franga nga kolegët e punës, shokët e ushtrisë, familjarët dhe të njohurit tjerë. Ai i kishte vënë në lajthitje të gjithë këta duke u treguar një rrëfim të rrejshëm për një kontratë me një kompani nigeriane të naftës dhe se pas realizimit të saj do të fitonte 21 milionë dollarë.