Emigranti shqiptar rrëfen tmerrin që përjetoi teksa po shkonte me gomone në Britani  

Foto Ilustrim

Emigranti shqiptar rrëfen tmerrin që përjetoi teksa po shkonte me gomone në Britani.

Më shumë se 12.000 shqiptarë, sipas autoriteteve britanike, kaluan kanalin e Lamanshit me gomone për të mbërritur në brigjet angleze vitin e shkuar.

Njëri prej tyre, Elisi, 23-vjeçari nga veriu i Shqipërisë, në një intervistë në Tch u shpreh se mospasja mundësi e ndërtimit të një jete të mirë, si pasojë e një page jo të kënaqshme nga puna si eskavatorist, e detyruan të largohet.

“Faktikisht më kishin thënë që ishte një rrugë shumë e qetë, do mbërrish shpejt, nuk do kesh probleme. Mirëpo më doli krejt e kundërta nga ajo çfarë ata më thanë mua. 10 ditë tentativë për t’u larguar me gomone, mirëpo kishte probleme me autoritetet franceze. Në ditën e 11 u nisëm, por ishte një tmerr i  madh, sepse kemi qenë 76 vetë në gomone. Një gomone me bazament ajri me jastëkë ajri nuk mund të përballojë 76 veta. Nga ora 3 e mëngjesit derti në ora 12 të drekës kemi bërë rrugëtim.  Gomonia nisi të mbushej me ujë. Kishim frikë. Njerëzit nuk rrinin rehat nga paniku. Ishte një tmerr, tmerr i  vërtetë”, thekson ai në rrëfimin e tij.

Këtë rrugë dhe tmerr të përjetuar përgjatë saj, Elisi nuk ua sugjeron bashkëkombasve të tij, përcjell albinfo.ch.

“Po, është e vërtetë, ka persona që presin. Mund të jenë në hotele apo çadra në pritje për të ardhur këtu. Unë nga rruga që kam bërë nuk do të doja që asnjë person të vinte me gomone. Është tmerrësisht e rrezikshme. Sidomos në këtë kohë që është tani. Është kohë e ftohtë. Tepër e rrezikshme”, shprehet ai.