Eurobarometri: Shumica e spanjollëve mbështesin anëtarësimin e Kosovës në BE

pixabay

Një sondazh i ri i publikuar nga Eurobarometer ka treguar se shumica e qytetarëve në disa vende të Bashkimit Evropian, të cilat ende nuk e kanë njohur pavarësinë e Kosovës, e shohin pozitivisht mundësinë që Kosova t’i bashkohet BE-së.

Sipas rezultateve, 53 për qind e qytetarëve të Spanjës janë në favor të anëtarësimit të Kosovës në Bashkimin Evropian, ndërsa 27 për qind janë kundër dhe 20 për qind mbeten neutralë. Në Rumani, 52 për qind shprehen pro, ndërsa 36 për qind janë kundër.

Përqindja e mbështetjes është më e ulët në disa shtete të tjera që nuk e njohin Kosovën: në Sllovaki arrin në 46 për qind, në Greqi 44 për qind dhe në Qipro 40 për qind, transmeton klankosova përcjell albinfo.ch.

Në përgjithësi, kur merren për bazë pesë shtetet mosnjohëse, mesatarja e mbështetjes për Kosovën është 47 për qind, krahasuar me 40 për qind që janë kundër. Në nivel të përgjithshëm të BE-së, përkrahja për integrimin e Kosovës arrin në 43 për qind.

Ky rezultat është cilësuar si befasues, veçanërisht në rastin e Spanjës – një vend që nuk e njeh shtetësinë e Kosovës, por ku opinioni publik shfaqet më pozitiv ndaj anëtarësimit të saj në BE sesa mesatarja evropiane.