Feronikeli sqarohet për biletat për ndeshjen me AC Milan

Më 10 gusht, në Prishtinë do të zhvillohet ndeshje miqësore mes skuadrës kosovare Feronikeli dhe AC Milan nga Italia, përcjell albinfo.ch.

Biletat tashmë kanë dalë në shitje online, me çmimet nga 35 deri në 155 euro ato të kategorisë VIP. Por këto çmime kanë zgjuar pakënaqësi te disa tifozë në Kosovë, të cilët i kanë vlerësuar të larta.

Lidhur me këtë pakënaqësi, ka reaguar edhe  Feronikeli, duke thënë se çmimet e ulësve i cakton kompania që e organizon eventin dhe se Ferrnonikeli “nuk mund të bëjë asgjë në këtë drejtim”.

“Kompania organizuese e këtij eventi të madh futbollistik, AS Events, ka të drejtën ekskluzive të shitjes së biletave dhe si e tillë, çmimet dhe vendosjen e tyre në bazë të ulësve e cakton vetëm ajo. Nuk duhet harruar që nuk kemi të bëjmë me një skuadër amatore, por me shtatë herë fituesin e UEFA Champions League. Është ndeshje historike për Kosovën dhe që asnjëherë më parë nuk ka zbarkuar skuadër më e madhe se Milan në “Fadil Vokrri”, sidomos për takime miqësore”, thuhet në reagim.

Ata po ashtu kanë kërkuar mirëkuptim për tifozët që nuk mund të sigurojnë bileta për ta përcjellë ndeshjen nga afër, duke i kujtuar që ndeshja do të transmetohet live në televizion.

FC Ferronikeli njëherësh u ka bërë thirrje tifozëve të interesuar që t’i sigurojnë biletat me kohë, sepse, siç kanë shkruara ata “vendet kanë filluar të zihen dhe interesimi është i jashtëzakonshëm për ta parë ndeshjen Feronikeli – Milan”.