Franca dëbon shqiptarin që shpëtoi një fëmijë nga zjarri, thotë se akti human i tij nuk u vërtetua

Francës nuk i mjaftoi akti heroik i një të riu shqiptar që vitin e kaluar rrezikoi jetën e vet teksa hyri në zjarr për të shpëtuar një 8-vjeçar në Poiters të Francës. Por ky shtet iu kundërpërgjigj atij duke ia refuzuar kërkesën për azil, transmeton albinfo.ch.

Roland Aliu shpresonte se do të përfitonte lejen e qëndrimit në Francë, për të cilën kishte nisur procedurat qysh më herët. Por, më 9 dhjetor autoritetet franceze e njoftuan se ai së bashku me familjen e tij kanë një muaj kohë për t’u larguar nga territori francez.

Madje, në vendimin për dëbim theksohet se akti i humanizmit kur shpëtoi fëmijën nga djegia nuk është arritur të vërtetohet nga shërbimet e urgjencës dhe policia që u mobilizuan mbrëmjen që ndodhi zjarri.

Vendimi për dëbim nuk prek vetëm Rolandin. Së bashku me të, nëse protesta e 7 janarit nuk do të ndryshojë rrjedhën e ngjarjeve, do të kthehen drejt Shqipërisë prindërit dhe vëllai i tij.